Preescolar na Casa

Reproducimos algúns fragmentos do informe das prácticas realizadas por unha alumna durante os dous últimos meses deste curso, no que con gran sensibilidade recolleu o que para ela significa e implica a actuación da Fundación Preescolar na Casa:

- “Os seus obxectivos e misión concrétanse nunha acción que eu vexo pioneira a nivel educativo.”

- “Preescolar na Casa está nun lugar privilexiado para poder identificar e intentar minimizar o risco social …onde as escolas non chegan… Antes de empezar as prácticas pensaba que a influencia familiar tiña moito que ver en determinadas condutas e necesidades especiais dos cativos e, agora, ademais de corroboralo, din por feito a necesidade e idoneidade do traballo da Fundación para enfocar a crianza e facelo de maneira reflexiva e cunha visión de futuro”

- ” En moitas ocasións, durante estes meses de prácticas, estiven exposta a aprendizaxes doutro tipo de moito maior calado, que os derivados do apartado educativo, por parte da acción da Fundación e tamén por parte dos seus profesionais. Isto é algo que, na miña opinión, soborda as cifras e as avaliacións:

• A acción social, a atención dos casos máis desfavorecidos e tamén a especial atención ao mundo rural (ou o que queda del) é unha “marca da casa” coa que a Fundación navega contra vento e marea.
• Forma grupo e comunidade tendo como referencia a educación… “Preescolar na Casa cumpre un papel que vai moito máis alá do campo educativo. O seu traballo cos nenos ofrece finalmente a oportunidade de que as orientadoras se insiran na vida colectiva das vilas e aldeas onde traballan… A extensión das actividades fai que esa cultura da infancia se vaia introducindo e consolidando, pouco a pouco,  no seo das comunidades onde actúa”.
• A súa actuación no rural paréceme máis necesaria que nunca. As formas de vida tradicionais e os valores que se transmiten neste ámbito  están en franco perigo de desaparición polo despoboamento e a soidade que experimentan moitas destas comunidades. Comunidades que necesitan servizos e vontades para fixar poboación. Isto ofréceo hoxe por hoxe PnC. No mundo urbano é tamén imprescindible e podería marcar unha liña de intervención diferente porque o contexto é totalmente diferente. Aquí hai servizos, os nenos van na súa maioría ás escolas infantís. Sen embargo, hai outra concepción da vida en comunidade, da axuda mutua e tamén da educación.
• A planificación, a avaliación, a reflexión, a formación, a colaboración con outros profesionais forman parte do día a día da actuación.

- “O contexto en que Antonio Gandoy fundou Preescolar na Casa no ano 1977 é moi diferente do que vivimos hoxe a nivel social… O groso e a importancia do volume de traballo desta institución, ignorada en ocasións inxustamente por unha sociedade que cada día perde polo camiño anacos de valores fundamentais, case convida a pararse a pensar no conxunto do proxecto para perderse nun universo diferente e bonito que xa é a día de hoxe parte fundamental da historia educativa galega”.

Comments are closed.