Favorecendo o achegamento das familias á escola
Durante esta primeira quincena de xuño, moitos dos nais, pais, nenos e nenas
participantes nos Espazos das Familias de Preescolar na Casa de distintas zonas de Galicia que se van incorporar á escola, están a realizar visitas aos distintos centros escolares onde se incorporarán no próximo mes de setembro. Trátase dunha actividade enriquecedora e positiva, moi valorada polas familias e polas propias institucións educativas, que ven nela un xeito de facilitar o período de adaptación, a convivencia na escola e a futura colaboración das familias. (Ao cole por primera vez (Fichas PnC “A aventura de crecer…”) )
A entrada na escola supón para os nenos e as nenas un paso decisivo. Comeza a escolaridade, que vai estar presente nas súas vidas cando menos ata os dezaseis anos.
Demasiados anos como para vivilos dun xeito negativo, polo que tanto pais e nais, coma mestres, mestras e institucións educativas en xeral debemos facer un esforzo para que esta etapa vital sexa vivida da mellor das maneiras posibles.
Por iso, estes días estanse a visitar os futuros Centros Escolares. Coñecer o centro, as súas instalacións e os seus traballadores acompañados dos papás e as mamás é importantísimo para achegarse con ilusión ao mundo novo da escola. O ano que ven os nenos van pasar nela moitas horas. Coñecer a propia aula é ao mestre tamén dará confianza e seguridade aos pais e nais.
Esta actividade de visita aos centros compleméntase coa reflexión sobre as actitudes e comportamentos que desde a familia poden favorecer a entrada dos nenos e nenas na escola e con información e motivación cara a necesaria colaboración de todos na educación dos nenos e nenas. (Familia e escola compartindo responsabilidades (Fichas PnC “A aventura de crecer, o desafío…”)
A partir de agora familia e escola teñen que estar xuntos polo que con esta actividade preténdese crear unhas boas bases iniciais que favorezan a comunicación e colaboración entre pais, nais, mestres e mestras o que influirá especialmente na adaptación positiva dos nenos ao centro e no seu desenvolvemento global.
Acudir cos fillos á escola, preocupándonos e participando do que alí se fai e favorecer a participación das familias na escola é un elemento determinante da calidade educativa e, o máis importante, aspecto clave para o desenvolvemento persoal e educativo das nenas e nenos.